Grønlands Politi veit í dag at siga, at herverk er framt móti fleiri gravstøðum í Upernavík.
Sermitsiaq sigur, at onkur hevur gjørt seg inn á tilsamans 16 gravir í kirkjugarðinum í býnum.
- Eitt nú eru krossar rivnir leysir ella oyðilagdir á annan hátt, sigur vaktleiðarin hjá løgregluni, Jeppe Andsager.
Løgreglan stendur á berum í málinum og sigur, at tey nú venda sær til almenningin um hjálp.
Herverkini eru framt í tíðarskeiðnum millum 20. september klokkan 16 og 21. september klokkan 19.
- Tað var fyrrapartin í gjár, at løgreglan fekk fráboðan um herverkini í kirkjugarðinum í Upernavík, veit Sermitsiaq at siga.