Bæði føroyingaliðini í bestu svensku hondbóltsdeildini, Sävehof og Hallby vóru í leiki í bólkaspælinum í svensku steypakappingini í kvøld.
Rói Ellefsen á Skipagøtu og liðfelagarnir í Hallby máttu lúta 26-30 fyri Tyresö úr næstbestu deildini á útivølli. Hallby var á odda 15-14 í steðginum, men tað gekk av skriðuni í seinna hálvleiki.
Rói skoraði trý mál í dystinum.
Í bólki 5 er Hammarby oddalið víð fýra stigum. Hallby og Tyresö hava tvey stig hvør. Aftast er Boden við ongum stigi.
Komandi leygardag klokkan 16 hevur Hallby torføran útidyst móti Hammarby.
Í bólki 1 vunnu Óli Mittún, Ísak Vedelsbøl og liðfelagarnir í Sävehof aftur stórsigur.
Í kvøld vann Sävehof á útivølli 38-28 á Varberg úr næstbestu deildini. Í fyrra hálvleiki beit Varberg væl frá sær, og í steðginum var Sävehof bara á odda við einum máli, 17-16, men pípan fekk eitt annað ljóð í seinna hálvleiki.
Óli skoraði fýra mál í kvøld.
Sävehof er fremst í bólki 1 við fýra stigum. Västerås Irsta hevur trý stig, Varberg hevur eitt stig, og aftast er Lindesberg við ongum stigi.
Komandi sunnudag klokkan 16 tekur Sävehof móti Västerås Irsta í Partille.
