Seinnapartin mánadagin var eitt bjargingarátak í Grønlandi, har ein jolla hevði siglt á ein flúr nærindis grønlendska høvuðsstaðnum, Nuuk.
Grønlands Politi fekk eitt neyðarkall klokkan 13.03 í gjár, og boðini vóru, at ein jolla á 20 føtur við tveimum fólkum umborð hevði siglt á ein flúr.
Løgreglubáturin Kimik, sum hesa løtu var ávegis til Nuuk úr Aasiaat, tá neyðarkallið kom, varð sendur á leiðina, haðani neyðarkallið kom.
Jollan, sum hevði siglt á flúrin, hevði alla neyðuga útgerð til bjarging umborð, eitt nú bjargingarvestar og bjargingarbát.
Men, Grønlands Politi valdi at binda um heilan fingur og setti bjargingarátak í verk.
- Ein bátur hjá Arktisk Kommando varð eisini sendur úr Nuuk at hjálpa til við bjargingararbeiðnum, sigur vaktleiðarin hjá Grønlands Politi, Jeppe Andsager.
Sambært Sermitsiaq, sum skrivar um hendingina í gjár, skilst, at alt gekk væl og tey bæði fólkini, sum vóru í jolluni, hava tað gott.
At síggja til fekk jollan ongan skaða.
Jeppe Andsager sigur, at tey bæði fólkini, sum vóru í jolluni, hava tað gott, og tey skulu nú sjálvi syrgja fyri, at fáa bátin til lands aftur.
