Í dag hittust TB og næstbesta liðið hjá HB fyri triðju ferð í ár. Hetta var fyrsti dysturin hjá teimum í Gundadali í ár, og úrslitið var 1-1. Hetta er sama úrslitið, sum tað var, tá ið HB 15. juni var gestur við Stórá í Trongisvági. Fyrru ferðina, HB var í Trongisvági, endaði tað við 4-0 heimasigri.
Úrslitið í dag ber við sær, at TB er á sætta plássi við 29 stigum. Tað eru átta stig fram til bronsuplássið, og harvið er møguleikin hjá TB at vinna beinleiðis uppflyting ikki so stórur.
HB er aftast, og stigið í dag ber við sær, at tað eru seks stig fram til áttanda plássið. KÍ, sum er á áttanda plássi, fær seinni í dag vitjan av AB.
Tað var TB venjarin Markus Torberg, sum eftir stóran hálvan tíma legði TB á odda 1-0. Hetta var fimta málið hjá Markusi í ár, og hann er nú TB toppskjútti saman við Torkili Holm.
Seks minuttir seinni javnaði HB til 1-1: Málskjútti var Djóni Samuelsen. Hetta var triðja málið hjá 17 ára gamla Djóna Samuelsen í 1. deild í ár.
Tølini siga, at bólturin var væl meiri í heimabrotsteiginum. TB vann 15 hornaspørk, og HB vann trý hornaspørk, men tað eydnaðist ikki TB at umseta meiri enn eina støðu til mál.
Næsti dystur hjá HB verður um tvær vikur á útivølli ímóti NSÍ.
Um tvær vikur fer TB aftur norður í høvuðsstaðin. Tá verður mótstøðuliðið AB.
