Í gjár sótu fleiri túsund ukrainar í streymloysi í Kherson har suðuri í Ukraina, tá Russland leyp á eina orkustøð í økinum.
Aftur í nátt hava russar lopið á Ukraina við teirri avleiðing, at í minsta lagi 4000 fólk í dag sita í streymloysi.
Ukrainski forsetin, Volodymyr Zelenskyj, sigur, at russiski herurin hevur lopið á eina transformatorstøð í landnyrðingspartinum av landinum, og álopið varð framt við dronum.
Forsetin skrivar á X, fyrrverandi Twitter, at harumframt hevur ein russisk rakett eisini rakt eina streymleiðing í Dnipropetrovsk-regiónini við teirri avleiðing, at 4000 fólk hava ongan streym.
Ukraina og Russland hava samstarvað við USA um eina semju, sum fyribils skal steðga álopunum á orkuverk hjá hvørjum øðrum, men stríðandi partarnir leggja nú hvønn annan undir at bróta hesa avtalu.
Russiska uttanríkisráðið leggur sambært Interfax-tíðindastovuni Ukraina undir at hava lopið á tvær russiskar orkustøðir seinastu 24 tímarnar.
