Forsetin í Moldova, sum er vesturlendskt sinnað, Maia Sandu, er afturvald í forsetaembætið.
Hetta vísir úrslitið hjá valnevndini í landinum.
Tá 98 prosent av atkvøðunum vóru taldar, hevði Maia Sandu fingið 54 prosent av atkvøðunum.
Russiskt sinnaði avbjóðarin, Alexandr Stoianoglo, hevði tá 46 prosent av atkvøðunum.
Tá valhølini í Moldova lótu aftur klokkan 21 lokala tíð í kvøld, høvdu 1,68 milliónir verið á vali, og sambært valnevndini svarar hetta til 54 prosent av teimum, sum hava valrætt.
- Moldova - tit hava vunnið! Í dag, kæru moldovar, hava tit víst á demokratiið, og tit hava bjargað Moldova. Í okkara vali av einari virðiligari framtíð er eingin tapari, segði Maia Sandu í sínari sigursrøðu.
Hetta skrivar tíðindastovan NTB í kvøld.
Moldova var partur av Sovjetsamveldinum, til tað gjørdist sjálvstøðugt land í 1991. Millum Moldova og Russland liggur krígsherjaða, Ukraina.
