Næstan í ein heilan minutt.
So leingi tók tað forsetanum í Russlandi, Vladimir Putin, og norðurkoreansku uttanríkisráðfrúuni, Choe Son-hui, at taka lógvatak, tá tey hittust á fundi í Kreml í russiska høvuðsstaðnum, Moskva, í dag.
Tað vísa videoupptøkur frá tiltakinum.
Fundurin fer fram í eini tíð, har vesturheimurin gevur samstarvinum millum Russland og Norðurkorea stóran ans. Hetta kemst av amerikanskum fráboðanum um, at túsundtals norðurkoreanskir hermenn eru í Russlandi.
Og nógv bendir á, at viðurskiftini eru góð.
Putin ger ráðfrúuni greitt, at fundurin er á russiska tjóðarsemjudegnum - ein almennur frídagur.
Og hann fær heita og kammeratligar heilsanir frá norðurkoreansku ráðfrúuni, sum hon hevur við sær frá koreanska leiðaranum Kim Jong-un.
Í síðstu viku segði amerikanski uttanríkisráðharrin, Antony Blinken, at USA metir, at tað eru umleið 8.000 norðurkoreanskir hermenn í Kursk-landslutinum í Russlandi.
Teir kunnu brúkast í krígnum móti Ukraina komandi dagarnar, metti hann.
Kursk-økið hevur mark móti Ukraina. Tað er her, at ukrainskar herdeildir fyrr í ár komu inn og tóku valdið á einum lítlum øki.
Russland hevur hvørki váttað ella avsannað, at norðurkoreanskir hermenn eru í Russlandi.
Vitjanin frá Choe er onnur norðurkoreanska vitjanin í Russlandi í seks vikur.
Norðurkoreanska uttanríkisráðfrúan hevur verið í Russlandi í nakrar dagar.
Fríggjadagin hevði hon sokallaðar strategiskar samráðingar við russiska uttanríkisráðharran, Sergej Lavrov.
- Sera tætt sambond eru komin í lag millum herin og fregnartænasturnar hjá báðum londunum, segði Lavrov í tí høvinum.
Samstundis segði Choe, at Norðurkorea "altíð fer at standa saman við okkara russisku feløgum til sigursdagin".
USA er saman við fleiri øðrum londum í vesturheiminum av teirri fatan, at norðurkoreanskir hermenn í Russlandi er ein herðing av krígnum í Ukraina.
Kortini hevur ukrainski forsetin, Volodymyr Zelenskyy, funnist at svarinum frá Vesturheiminum. Eftir forsetans tykki hevur svarið ikki verið nóg hart.
Framvegis frættist um harðar bardagar í eystara parti av Ukraina.
Í september gingu russiskar deildir fram við hægstu ferð síðani í mars í 2022. Tað vísa almenn atkomulig tøl sambært tíðindastovuni Reuters.
Ritzau/Reuters
