Myndugleikarnir í Japan ávara í dag milliónir av íbúgvum um, at teir møguliga noyðast at fara úr húsum sínum.
Tað upplýsir AFP-tíðindastovan.
Hetta eftir at nógv regn hevur elvt til vatnflóð og skriðulop í landsynningspartinum av Japan. Fleiri borgarar eru saknaðir í hesum sambandi.
Sjónvarpsupptøkur ymsastaðni í Kumamoto-økinum vísa hús, handlar og akfør standa í umleið einum meturi av vatni, skrivar AFP.
Kumamoto liggur á suðuroynni Kyushu.
Tíðliga í morgun lokala tíð komu 37 sentimetrar av regni í Tamana, sum liggur í Kumamoto og er harðast rakti býurin í økinum, uppá seks tímar. Tað upplýsir veðurstovan í Japan.
- Støðan er lívshættislig, og trygdin skal tryggjast beinanvegin, sigur myndugleikin.
- Mesta áræði krevst. Sjálvt í økjum, har vanlukkur vanliga ikki væntast at henda.
Sambært myndugleikunum eru ymisk sløg av rýmingarávaringum givin tilsamans fleiri enn trimum milliónum íbúgvum í landsynningsøkinum í landinum.
Umleið 3.484.000 borgarar, serliga í Kumamoto, eru fevndir av álvarsligastu ávaringini í Japan, stendur í fráboðanini. Tað er ikki greitt, hvat ein slík ávaring hevur við sær.
Ein lokalur embætismaður sigur við AFP, at ein maður í býnum Kosa í Kumamoto varð fráboðaður saknaður tíðliga í morgun. Hetta hendi eftir eitt skriðulop nærhendis húsum hansara, tá hann stóð uttanfyri við bilinum.
Kona hansara og tvey børn vóru trygt inni í bilinum, stendur í fráboðanini.
Sambært sjónvarpsstøðini NHK eru tvey fólk í býnum Fukuoka eisini saknað, eftir at tey eftir øllum at døma vórðu tikin av streyminum í eini á, har vatnstøðan var hækkað orsakað av regninum.
Í Misato, eisini í Kumamoto, royndu bjargingarfólk at røkka einum eldri manni, sum var fangaður í húsi sínum, eftir at tey vóru rakt av einum skriðulopi, sigur lokali embætismaðurin, Kazuhiro Masunaga.
- Regnið var so nógv, at eg í fýra til fimm tímar ikki sá, hvat var framman fyri mær, sigur Masunaga.
/Ritzau/
