Formaðurin í grønlendska flokkinum Siumut, Erik Jensen, tók í dag avleiðingarnar av valtapinum hjá flokkinum í gjár á valinum til Inatsisartut, grønlendska tjóðartingið.
Hann hevur boðað starvsnevnd floksins frá, at hann leggur frá sær sum formaður. Tað upplýsir Siumut í tíðindaskrivi, sum er sent Ritzau.
Nevndin hevur samstundis valt Vivian Motzfeldt til nýggja forkvinnu. Hon var varaforkvinna áður.
Á valinum til Inatsisartut fekk Siumut, sum hevur sitið við valdið í Grønlandi í nógv ár, 14,7 prosent av atkvøðunum. Hetta var bara helmigurin í mun til valúrslitið í 2021.
Tey 14,7 prosentini vóru nóg mikið til fýra sessir, og harvið er Siumut fjórðstørsti flokkur í Grønlandi nú.
Bæði Erik Jensen og Vivian Motzfeldt vórðu vald í Inatsisartut. Tey fingu ávikavist 645 og 247 persónligar atkvøður.
Erik Jensen hevur verið formaður í Siumut síðani 2020, tá hann vann á táverandi formanninum, Kim Kielsen, í einum umstríddum vali um sessin.
Í núverandi stjórn, sum er mannað við Inuit Ataqatigiit (IA) og Siumut, situr Erik Jensen sum fíggjar- og skattamálaráðharri.
Vivian Motzfeldt er sjálvstýris- og uttanríkisráðharri.
Spurningurin er tó, um tey bæði framhaldandi verða ráðharrar, tá nýtt landsstýrið verður skipað í Grønlandi. Vinnarin av valinum í gjár, Demokraatit, hevur nú samráðingarrttin til at skipa nýggja stjórn.
/Ritzau/
