- Fólkið hevur talað.
Tað sigur Keir Starmer, formaður í bretska Labour-flokkinum, í røðu í nátt.
Alt bendir á stórsigur til Labour eftir tjóðartingsvalið í gjár. Sostatt stendur Starmer til at gerast næsti forsætisráðharri í Bretlandi.
- Nú er tað okkara túrur at levera, sigur Starmer.
- Broytingin byrjar nú.
Sambært kanning á valstøðum, sum er gjørd í samstarvi millum bretsku sjónvarpsstøðirnar Sky News, BBC og ITV, stendur Labour fyri at fáa 410 sessir í Undirhúsinum.
Hetta ger Labour til nógv størsta flokkin.
- Fólk eru til reiðar til broytingar, sigur Starmer.
Konservativi flokkurin gerst næststørsti flokkur í kanningini við 131 sessum í Undirhúsinum.
Flokkurin gongur munandi aftur. Á tjóðartingsvalinum í 2019 fekk hann 365 umboð í Undirhúsið, sum telur 650 limir.
Konservativi flokkurin hevur sitið í stjórnini seinastu 14 árini.
Liberaldemokratarnir, sum er ein sosialliberalur flokkur, verður triðstørstur við 61 sessum, um veljarakanningarnar á valstøðunum verða rættar.
Sambært kanningini letur valið dyrnar upp fyri einum flokki, sum ikki áður hevur verið umboðaður í Undirhúsinum: Nýskipanarflokkinum, undir leiðslu av Nigel Farage, sum serliga er kendur fyri at hava staðið á odda fyri Brexit-herferðini .
Sambært kanningini fær Nýskipanarflokkinum, sum er á høgravongi, 13 umboð í Undirhúsið.
Labour sær út til at fáa sítt besta valúrslit síðani 1997, tá flokkurin vann 418 umboð í Undirhúsið.
Samanborið við seinasta tjóðartingsval í 2019 er talið av tinglimum hjá Labour tvífaldað, vísir valstaðskanningin.
/ritzau/Reuters
