Russland er fyrsta land í heiminum, sum viðurkennir Taliban sum stjórn í Afganistan.
Tað skrivar russiska uttanríkisráðið í eini fráboðan hósdagin.
- Vit meta, at almenna viðurkenningin av stjórnini í Islamiska Emiratinum í Afghanistan fer at geva íkast til menning av produktivum tvílandasamstarvi millum lond okkara á ymsum økjum, skrivar russiska uttanríkisráðið í eini fráboðan.
Ráðið váttar eisini avgerðina fyri statsligu russisku tíðindastovuni Tass.
Russiski forsetin, Vladimir Putin, tók avgerðina eftir áheitan frá russiska uttanríkisráðharranum, Sergej Lavrov. Tað segði russiski sendiharrin í Afganistan, Dmitrij Zhirnov, við russiska sjónvarpið, sambært fjølmiðlunum.
- Tað (viðurkenningin av Taliban sum stjórn í Afghanistan, red.) vísir inniliga ynskið hjá Russlandi um at fáa eitt umfatandi samstarv við Afghanistan, segði sendiharrin.
Uttanríkisráðharrin í Afganistan, Amir Khan Muttaqi, kallar avgerðina fyri "djarva".
Tað ger hann í einum videobroti, sum er lagt út á X, har hann hittir Dmitry Zhirnov, skrivar tíðindastovan AFP.
Hann leggur eisini dent á, at avgerðin verður ein fyrimynd fyri onnur.
- Nú tilgongdin at viðurkenna er byrjað, er Russland framman fyri øll hini, sigur Amir Khan Muttaqi.
Fyrr í ár strikaði Russland Taliban av sínum yvirgangslista.
Russland setti Taliban á yvirgangslistan í 2003, tí Taliban stuðlaði loysingarmonnum í Norðurkaukasus.
Russland var eisini fyrsta landið, sum læt upp vinnuliga umboðan í Kabul eftir valdsskiftið. Russland hevur eisini boðað frá ætlanum um at brúka Afghanistan sum transittland fyri gass á til Suðureysturasia.
Fleiri lond hava sendiharrar hjá Taliban í sínum høvuðsstaðum, men eingin hevur higartil viðurkent bólkin.
Sambært tíðindastovuni NTB lat sendistovan hjá Afghanistan í Noregi uppaftur í mars, men uttan sendiharra. Ein fyrsti skrivari stendur á odda fyri sendistovuni í staðin.
Taliban fekk valdið aftur í Afghanistan í 2021. Hernaðarrørslan stýrdi eisini Afghanistan frá 1996 til 2001.
/Ritzau/
