Avbjóðingarnar hópa seg upp hjá Tesla, sum hevur havt eina afturgongd í inntøkunum, eftir at marknaðarparturin hjá elbilaframleiðaranum er fallin í Evropa.
Inntøkurnar hjá felagnum í fyrsta ársfjórðingi minkaðu við níggju prosentum í mun til sama ársfjórðing í 2024.
Tað sæst í ársfjórðingsfrágreiðingini hjá Tesla, sum varð almannakunngjørd í kvøld okkara tíð, eftir at partabrævamarknaðurin stongdi í USA.
Inntøkurnar eru 19,34 milliardir dollarar. Tað svarar til stívliga 125 milliardir danskar krónur.
Sambært MarketWire var væntanin, at inntøkurnar fóru at fara upp um 21 milliardir dollarar.
Bruttovinningurin endaði á 3,2 milliardum dollarum, sum svarar til eina minking uppá 15 prosent, tá samanborið verður við somu mánaðir í fjør.
Partabrøvini hjá Tesla hækkaðu í dag 4,6 prosent, men eru lækkað meira enn 40 prosent síðani ársskiftið.
Hóast tølini í fyrstani vóru skuffandi í roknskapinum, so hækka partabrøvini hjá Tesla nakað á amerikanska eftirmarknaðinum.
Talið av seldum bilum er minkað við 13 prosentum fyrsta ársfjórðing.
Sambært tíðindastovuni Reuters er hetta millum annað tengt at, at stjórin í Tesla, Elon Musk, hevur gjørt vart við seg á politiska pallinum.
Tøknimiljarderurin hevur víst seg sum ein av størstu stuðlunum hjá amerikanska forsetanum Donald Trump og stendur á odda fyri amerikanska ráðnu fyri stjórnareffektiviteti (DoGE).
Tað hevur til endamáls at seta í verk stórar niðurskurðir í sambandsríkinum USA.
Sølan av Tesla bilum í Danmark er minkað meira enn niður í helvt fyrsta ársfjórðing í ár í mun til sama tíðarskeið í 2024.
Í Føroyum er sølan minkað við 77 prosentum, úr 17 Teslabilum fyrsta ársfjórðing í fjør niður í 4 fyrstu tríggjar mánaðirnar í ár.
Sama gongdin sæst eisini í øðrum evropiskum londum, eitt nú Fraklandi, Svøríki og Hollandi.
Tesla skrivar í roknskapinum, at "skjótt mennandi handilspolitikkur" ávirkar veitingarketuna og kostnaðarbygnaðin hjá felagnum.
Hetta kann hava stóra ávirkan á eftirspurningin eftir vørunum hjá Tesla uppá stutta tíð, leggur felagið afturat.
Tesla hevur áður boðað frá, at felagið leveraði 336.681 bilar í fyrsta ársfjórðingi. Tað er undir væntanum hjá greinarum.
/Ritzau/
