Í kvøld fór AB fyri sjeyndu ferð á rað av vølli við fullari úrtøku.
Argjamenn vóru á útivølli ímóti Víkingi, sum átti heimavøll uppi á Brekku í Leirvík.
Sum tað sæst á myndini, so var pallurin glæsiligur.
AB skoraði eitt mál í fyrra hálvleiki og eitt mál í seinna hálvleiki.
Ein lítil hálvur tími var farin, tá ið Bartal Skaalum Petersen legði AB á odda. Uppleggið átti Rógvi Skála. Hetta var fjórðu ferð í ár, at Bartal S. Petersen var málskjútti í landskappingini.
Spenningurin helt sær, inntil tað restaðu sjey minuttir. Tá var tað Jeremiah Mensah Okornoe, sum økti um leiðsluna. Hann var tveir minuttir frammanundan skiftur inn. Hetta var aðru ferð í ár, at 21 ára gamli ganesiski spælarin var málskjútti í næstbestu deildini.
AB er á triðja plássi við 20 stigum. Um tað mánakvøldið eydnast AB á heimavølli at vinna útsetta dystin ímóti EB/Streymi, so verður AB á uppflytingarplássi eftir fyrsta triðingin av hesum kappingarárinum.
Víkingur er á fjórða plássi við 15 stigum.
Fríggjadagin í næstu viku eigur AB heimavøll ímóti NSÍ.
Hósdagin í næstu viku eigur Víkingur heimavøll ímóti Skála.
