Noreg útflutti 5.956 tons av makreli í juli í ár.
- Útflutningsvirðið av hesum var 185 norskar milliónir, sum svarar til 115,4 milliónir í okkara peningi.
Kystmagasinet.no veit at siga, at hetta er ein munandi minking í mun til somu tíð í fjør, har virðið í juli í ár minkaði við 15 prosentum og nøgdin við 34 prosentum.
- Orsøkin til minkandi útflutningstølini stendst av slakari makrelveiði í norðurøkjunum, skrivar heimasíðan.
Sagt verður, at meðan høvuðsvertíðin fyri makrelveiði vanliga byrjar í august, hevur tað seinastu fýra árini eisini verið støðugur fiskiskapur í juni og juli, serliga kring Lofoten.
- Hesa tíðina hava vanliga verið landað millum 12.000 og 14.000 tons av makreli.
Kystmagasinet.no veit at siga, at í ár hevur hesin fiskiskapur verið munandi lakari enn undanfarin ár.
- Samlaðu makrellandingarnar í juni og juli komu bert upp á 8000 tons sum er stór minking.
Norska heimasíðan skrivar, at vøkstur hinvegin hevur verið í hjáveiðini av makreli í fiskiskapi eftir norðsjóvarsild.
- Hesin makrelur skilir seg frá heystmakrelinum, tí makrelurin, sum er uppi í hjáveiðini av norðsjóvarsild, er smærri, og fitiinnihaldið er minni.
Sambært Kystmagasinet.no er hjáveiðimakrelurin uppi í fiskiskapinum eftir norðsjóvarsild serliga væl umtóktur á afrikanska marknaðinum.
##med2##
- Hesin makrelurin verður í høvuðsheitum royktur, sigur Jan Eirik Johnsen, sum starvast við uppsjóvarfiski í Norges Sjømatråd.
Við sildini var gongdin í Noregi í juli meira positiv enn gongdin við makrelinum.
- Í juli útflutti Noreg tilsamans 9.521 tons av sild fyri 184 norskar milliónir, sum svarar til 114,9 milliónir krónur í okkara peningi, veit Kystmagasinet.no at siga.
Meira um hetta kann lesast á - https://www.kystmagasinet.no/eksport/fisket-mye-mindre-markell/1976394
