Nú eru øll liðini komin á støðutalvuna. Síðsta liðið, sum var uttan úrtøku, var FC Suðuroy.
Seint seinnapartin var TB gestur á Vágseiði, og tað endaði við, at FC Suðuroy vann 1-0.
Einasti málskjútti í dag var miðvallarin Dánjal Godtfred. Hann sendi beinanvegin í seinna hálvleiki við høvdinum bóltin í málið, og uppleggið úr høgru átti Olivur Renéson Thomsen, sum í fjør spældi við TB.
Hetta var fyrsti sigurin hjá FC Suðuroy í bestu deildini síðani 27. september í 2015. Ta ferðina vann FC Suðuroy 5-2 á heimavølli ímóti ÍF.
Tríggir spælarar, sum vóru við í trivaliga sigrinum ímóti ÍF í 2015, vóru eisini á FC Suðuroy liðnum í dag.
Teir vóru málskjúttin í dag Dánjal Godtfred, Salmundur Bech og so John Villi Wøldike Leo, sum fimm minuttir undan leikloki varð skiftur inn.
Gula kortið var sjey ferðir á lofti – fimm ferðir til heimaliðið og tvær ferðir til gestirnar – men tað var ongantíð øði í grindini, sum tað onkuntíð hevur verið fyrr, tá ið talan hevur verið um grannauppgerðir.
Meðan teir í heimaleguni sjálvandi stórfegnast um, at teir nú í fjórða umfari loksins eru komnir á stigatalvuna, so eru teir vónbrotnir í TB leguni.
Gilli Rólantsson Sørensen orðar tað soleiðis í samrøðu við Hera Á. Simonsen í FM1:
-Tað er stórt vónbrot at tapa ímóti tí liðnum, sum ikki hevur skorað nakað mál undan grannauppgerðini í dag, og sum ikki skapti fleiri møguleikar í dag. Vit mugu bara staðfesta, at hugburðurin og avrikið hjá okkum var ikki nóg gott til at vinna, staðfestir Gilli Rólantsson Sørensen.
Bæði FC Suðuroy og TB fara mánakvøldið um Suðuroyarfjørð at spæla í steypakappingini:
FC Suðuroy fer mánakvøldið at spæla á Argjum, og TB fer mánakvøldið at spæla á Skála.
