Fyri aðru ferð í fimm dagar fór B36 í kvøld av vøllinum við fullari úrtøku eftir 1-0 sigur.
Sunnudagin var tað á útivølli ímóti TB, og í kvøld var tað á heimavølli ímóti Víkingi.
Einasta málið í kvøld varð skorað, áðrenn eitt korter var farið. Málskjútti var vongverjin í høgru hjá B36 Bergur Jákupsson Poulsen, sum fekk sína fótbóltsuppaling í Sarpugerði og Víkingi, áðrenn hann flutti til EB/Streym, og í kvøld var hann fyrstu ferð málskjútti, síðani hann í vetur flutti í Gundadal og til B36.
Uppleggið átti Marius Kryger Lind, sum av álvara aftur hevur fingið luft undir veingirnar.
Talan var um javna uppgerð í spælbýti og royndum ímóti málinum. Tølini siga tó, at Víkingur vann níggju hornaspørk, meðan B36 vann trý hornaspørk.
Tølini siga, at Víkingur eftir tapið í kvøld er næstaftast og harvið undir niðurflytingarstrikuni. Í fýra dystum hevur Víkingur bara skorað eitt mál. Tað var í 1-1 javnleikinum á útivølli ímóti TB í fyrsta umfari.
Í kvøld gekk tað ikki væl at vinna málmøguleikar ímóti B36 verjuni, har Bogi Reinert-Petersen av álvara hevur funnið sítt pláss.
Sigurin hjá B36 ber við sær, at árstalsfelagið nú er á fjórða plássi við seks stigum.
Mánakvøldið fer Víkingur at spæla steypadyst á heimavølli ímóti NSÍ, og B36 fer at spæla steypadyst í Sørvági ímóti 07 Vestur.
Í landskappingini fer Víkingur annað leygarkvøld at spæla í Klaksvík, og B36 fer annan sunnudag at spæla ímóti grannunum í HB.
