Amerikanski uttanríkisráðharrin, Marco Rubio, minkar um væntanirnar um eitt gjøgnumbrot í samráðingunum millum Russland og Ukraina í Istanbul hesa vikuna.
Einans við beinleiðis samráðingum millum amerikanska forsetan, Donald Trump, og russiska forsetan, Vladimir Putin, ber til at ganga framá, heldur Rubio.
Tað segði hann við journalistar hósdagin í Antalya í Turkalandi, har hann luttók á einum NATO-fundi.
- Eg skal vera erligur. - Vit hava ikki stórar væntanir til tað, sum hendir í morgin, sigur Rubio.
- Mín meting er, at vit ikki fáa nakað gjøgnumbrot her, fyrr enn Trump forseti og Putin forseti hava beinleiðis samband um hetta málið, heldur Rubio fram.
Líknandi boð komu fyrr í dag frá Trump.
- Einki fer at henda, fyrr enn eg og Putin seta okkum saman, okay, segði Trump fyrr í dag, sambært Financial Times.
Russland hevur sent sendinevnd við tveimum vararáðharrum á odda.
Forsetin í Ukraina, Volodymyr Zelenskyj, hevur ferðast til Turkalands og hevði boðið Putin at koma at hitta seg í Istanbul.
Rubio leggur afturat, at hann fer at hitta ukrainsku sendinevndina í Istanbul í morgin.
Samstundis skal hann eisini hitta turkiska starvsfelagan, Hakan Fidan.
/Ritzau/
