Hóskvøldið framdu russar dronuálop á ukrainska býin, Kharkiv. Álopið kostaði í minsta lagi trimum fólkum lívið, og 32 vórðu særd.
Tað upplýsti borgarstjórin í býnum, Ihor Terechov, og Kharkiv er næst størsti býur í Ukraina.
- Russiska dronuálopið rakti ein íbúðarbygning, og millum tey særdu er eitt barn, segði borgarstjórin við The Kyiv Independent.
Men, hetta var eftir øllum at døma ikki nóg mikið hjá russum í hesum umfari, tí forseti landsins er - soleiðis sum hann uppførir seg - rættiliga blóðtystur.
Aftur í dag hava eirindaleysu russisku álopini á grannalandið sambært ukrainsku myndugleikunum kostað fleiri mannalív.
Í dag hava russar framt loftálop á ukrainska býin, Kryvyi Rih, og her hava í minsta lagi 14 fólk latið lív, harímillum fleiri børn.
Tað siga ukrainsku myndugleikarnir í kvøld.
Í kvøld váttar eisini russiska verjumálaráðið, at russiski herurin hevur framt rakettálop á býin.
Sambært russiskum myndugleikum varð álopið framt móti einari matstovu, har fleiri fólk vóru savnað á fundi.
- Út við 85 ukrainskir embætismenn og ovastar, umframt vesturlendskir instruktørar, lótu sambært russisku myndugleikunum lív í álopinum.
Norska kringvarpið - NRK - sigur, at upplýsingarnir, sum russiska verjumálaráðið kemur við, ikki eru váttaðar av øðrum keldum.
Dagføring:
Nýggjastu tølini úr Ukraina siga í kvøld, at russiska álopið á býin, Kryvyi Rih, fyribils hevur kostað 16 fólkum lívið.
##med2##
