Óli Mittún, Ísak Vedelsbøl og liðfelagarnir í Sävehof eru trygt víðari í svensku steypakappingini.
Sävehof vann innleiðandi bólk 1 við fullum stigatali, 6 stigum.
Í dag vann Sävehof á heimavølli í Partille greiðan 39-30 sigur á Västerås Irsta, ið spælir í næstbestu deildini.
Í steðginum var Sävehof á odda 19-17.
Ísak skoraði fýra mál, og Óli sum ikki spældi so stóran leiklut í dag skoraði eitt mál.
Rói Ellefsen á Skipagøtu og liðfelagarnir í Hallby vunnu seg ikki víðari í steypakappingini.
Ígjár taptu Rói og liðfelagarnir 28-32 (14-15) fyri Hammarby á útivølli. Hallby endaði aftanfyri Tyresö úr næstbestu deildini í bólki 5, og tað er ein stór strika í rokningini hjá Hallby. Hammarby fekk seks stig, Tyresö fekk fýra stig, og Hallby er nummar trý við tveimum stigum.
