Í nátt var russiski høvuðsstaðurin, Moskva, fyri einum av størstu dronuálopunum higartil í krígnum millum Russland og Ukraina, sum nú gongur á fjórða ári.
Á sosialum miðlum í morgun síggjast fleiri video-upptøkur - eisini deildar av Telegram-rásini Baza, sum hevur tætt tilknýti til russiskar trygdarmyndugleikar.
Tað var um 04-tíðina í nátt, at fleiri dronur vórðu skotnar móti Moskva og níggju øðrum regiónum í Russlandi.
Í russiska verjumálaráðnum, sum almenna tíðindastovan Tass endurgevur, verður álopið váttað.
Russland sigur, at 91 av tilsamana 337 dronum, sum russiska verjan skeyt niður í nátt, høvdu russiska høvuðsstaðin sum mál.
Ukrainski loytnanturin, Andrej Kovalenko, váttar á Telegram, at Ukraina hevur lopið á Moskva í nátt við fleiri dronum.
##med2##
Ukrainska álopið á Moskva í nátt kemur bert tímar, áðrenn USA og Ukraina eftir ætlan skulu til samráðingar um eina friðarætlan millum Ukraina og Russland.
Samstundis, sum Ukraina hevur lopið á russisk mál í nátt, sigur ukrainska verjan seg sambært Reuters hava skotið niður eina ballistiska russiska rakett av slagnum, Iskander-M, umframt 79 av tilsamans 126 dronum, sum Russland hevur sent inn í Ukraina í nátt.
Borgarstjórin í Moskva, Sergej Sobjanin, kallar álopið á Moskva í nátt "massivt", og á Telegram sigur hann, at eitt fólk hevur latið lív og fleiri eru særd í ukrainska álopinum.
Seinni hava russisku myndugleikarnir upplýst, at tvey fólk hava latið lív.
##med3##
