Fleiri enn 20 fólk eru deyð í einum russiskum rakettálopi á ukrainska býin Sumy.
Tað upplýsti virkandi borgarstjórin í býnum, Artem Kobzar, á sosiala miðlinum Telegram í dag.
Býurin, sum hevði umleið 256.000 íbúgvar í 2022, hevur verið raktur av hørðum russiskum álopum seinastu vikurnar, skrivar tíðindastovan AFP.
Forsetin í Ukraina, Volodymyr Zelensky, skrivar eisini um álopið, sum hann sigur ávirkaði býarlívið pálmasunnudag.
Hann nevnir eingi deyðstøl, men boðar frá nógvum deyðum og særdum og sigur, at bjargingarátak er í gongd.
- Eitt ógvusligt russiskt rakettálop á Sumy, skrivar Zelensky á Telegram og heldur fram:
- Og so á hesum degi tá fólk fara í kirkju - Pálmasunnudag.
Sambært ukrainska innanríkisráðnum hava 83 fólk fingið skaða. Hetta veit AFP at siga.
Russland hevur ikki gjørt viðmerkingar enn.
Tað eru umleið 30 kilometrar frá býnum Sumy til markið til russiska Kursk-økið.
Ukraina gjørdi seg inn økið í fjør sum liður í einum álop, sum undraði nógvar eygleiðarar og var størsta álop á Russland síðani seinna heimsbardaga.
Nú roynir Russland at berjast móti teimum seinastu ukrainarunum í økinum, har Russland eisini hevur fingið hjálp frá Norðurkorea.
Samstundis er russiska virksemið á ukrainsku megin markið vaksið.
Guvernørurin í Sumy-landslutinum, Volodymyr Artyukh, hevur sambært tíðindastovuni Reuters sagt, at russisk álop í økinum eru vaksin við 30 prosentum seinastu vikurnar.
Álopið hendir í eini tíð, har USA stríðist fyri at fáa vápnahvíld í Ukraina. Men ágóðin av amerikansku átøkunum hevur higartil verið avmarkaður.
Higartil hevur tað eydnast millum annað at fáa eina avmarkaða vápnahvíld um orkuinfrakervið í lag. Men Ukraina og Russland skuldseta framvegis hvørt annað fyri at bróta vápnahvíldina.
Amerikanski diplomatiski sendiharrin, Steve Witkoff, og russiski forsetin, Vladimir Putin, hittust fríggjadagin í Sankta Pætursborg, og eingin fráboðan er um nakað gjøgnumbrot.
Samstundis er amerikanski forsetin, Donald Trump, farin at vísa tekin um, at hann missir tolið. Sostatt hevur hann heitt á Putin um at byrja at ganga framá.
/Ritzau/
