Í nógv ár hevur eingin skúlagongd verið í Søldarfjarðar skúla. Børnini í bygdini og á Skipanesi hava ístaðin havt sína skúlagongd á Glyvrum og í Runavík.
- Bygningurin hevur kortini verið í brúki, og hesi seinnu árini - umframt annað virksemi - hevur eisini verið vøggustova og taekwondo-ítróttur í skúlanum.
Soleiðis siga tey í Runavíkar kommunu.
Lagt verður aftrat, at í fleiri ár hava umvælingar verið gjørdar eftir tekningum hjá Fuglark, sum upprunaliga sniðgóvu bygningin, og í gjár var sjøtul settur á byggistig 5 í umvælingararbeiðnum.
Fyri einum góðum ári síðan vórðu tvær nýggjar vøggustovur tiknar í nýtslu í ovaru hæddini, umframt tær báðar stovurnar, sum frammanundan vóru í niðaru hæddini og ítróttin, sum er framvegis í fimleikahøllini.
Í Runavíkar kommunu siga tey, at tað, sum nú fer at vera gjørt, snýr seg um at umvæla útveggirnar á norðara endanum á skúlanum.
Í gjár skrivaðu Heri Hansen fyri Timburtænastuna og Tórbjørn Jacobsen sum borgarstjóri, undir sáttmála um at fáa framt 5. stigið í samlaðu ætlanini.
- Undirskrivaða avtalan kostar slaka 1,2 milliónir krónur, og tað er Timburtænastan, sum hevur avrikað øll hini byggistigini, siga tey í Runavíkar kommunu.
