Í løtuni fiska fimm partrolarapør upsa og annan hvítfisk, harav tvey pør væntandi koma inn at landa í næstu viku.
Tvey partrolarapør eru á gulllaksaveiði, men nú fer gulllaksavertíðin, sum vanliga byrjar í apríl, at styttast.
Á Fiskamarknaði Føroya vita tey í dag at siga, at tveir djúpvatnstrolarar fiska svartkalva. Teir hava smáligan fiskiskap.
Sagt verður, at ein frystitrolari fiskar undir Føroyum, og ein er í Eysturgrønlandi, og eisini hesir báðir fiska svartkalva.
Um teir smáu trolbátarnar verður sagt, at tveir eru norðan fyri og fáa mest av toski, hýsu og nakað av flatfiski.
- Tríggir trolbátar eru á landleiðini. Teir fáa mest av flatfiski og toski. Fiskiskapurin er smáligur, og bátarnir eru eisini tarnaðir av veðri.
Allir teir smáu trolbátarnir koma inn at landa í næstu viku.
Fýra garnaskip eru eisini til fiskiskap. Tvey fiska svartkalva, og tvey fiska havtasku. Skipini hava misjavnan fiskiskap.
- Øll garnaskipini koma inn at landa í næstu viku, vita tey á Fiskamarknaði Føroya at siga í dag.
