Fjúrtandi sigurin á rað hjá Paula og liðfeløgunum í HØJ

Landsliðsmálverjin, Pauli Jacobsen, Hans Lindberg og hinir hjá HØJ standa seg ótrúliga væl í næstbestu donsku hondbóltsdeildini. 

Ígjár vann HØJ fjúrtanda dystin av fjúrtan møguligum hetta kappingarárið. Og teir eru greitt oddalið við 28 stigum.

Ígjár vann HØJ á heimavølli í Jyllinge-høllini 34-25 á Roskilde. Í steðginum var heimaliðið á odda 16-11.

Komandi fríggjakvøld spælir HØJ dyst móti Skive á útivølli. Skive er triðfremst í deildini við 23 stigum. 

Bogi Hansen skoraði fimm mál, Janus Dam Djurhuus skoraði trý mál, og Jónas G. Djurhuus skoraði eitt mál, tá FIF ígjár á heimavølli tapti 28-30 fyri Skive. Í steðginum var støðan javnleikur 12-12.

Komandi leygardag klokkan 13.30 spælir FIF móti liðnum hjá Kjartani Johansen, Lemvig-Thyborøn á útivølli. 

Pætur Mikkjalsson og liðfelagarnir í Team Sydhavsøerne taptu í dag fimta dystin á rað. Beint norðanfyri markið til Týsklands taptu suðuroyggjamenn 23-31 fyri gamla liðnum hjá Teis Horn Rasmussen, Tønder. Heimaliðið var á odda 17-14 í steðginum. Pætur skoraði trý mál.

Komandi leygardag klokkan 14 taka Pætur og liðfelagarnir móti Teis Horn Rasmussen, Peter Krogh og liðfeløgunum í HC Aarhus á heimavølli.

Dysturin millum liðið hjá Teis Horn Rasmussen og Peter Krogh, HC Aarhus og liðið hjá Kjartani Johansen, Lemvig-Thyborøn í Skæringshøllini í Aarhus endaði við javnleiki 25-25. Í steðginum var Lemvig-Thyborøn á odda 12-10. Teis og Peter skutu eitt mál hvør. 

Støðan: