Ísraelska stjórnin hevur samtykt at víðka um búsetingarnar á hersettu Golanheyggjunum, sum fólkarættarliga eru sýriskt landaøki.
Forsætisráðharrin, Benjamin Netanyahu, sigur, at avgerðin er tikin "í ljósinum av krígnum og nýggja hermótinum í Sýria..."
Eftir at sýriska Assad-stjórnin fall fyri einari viku síðan, hevur Ísrael framt fleiri hundrað álop á hernaðarmál í Sýria.
Haraftrat hava ísraelsk herfólk tikið seg fram á markinum millum Ísrael og Sýria, og ísraelsku herliðini eru fleiri kilometrar inni á sýriskum landaøki.
Tíðindastovan NTB veit at siga, at ísraelsku herliðini hava fingið boð um at vera verandi inni í sýriskum landaøki í vetur.
