Floksleiðarin, Kristrún Frostadóttir, verður nýggjur forsætisráðfrú Íslands.
Tað upplýsir tíðindastovan Reuters.
Hetta hendir eftir at forseti Íslands, Halla Tómasdóttir, skipaði nýggju stjórnina í dag eftir altingsvalið í november.
Málið hjá stjórnini verður at raðfesta búskapin í landinum, sigur Kristrun Frostadóttir, sambært íslendska miðlinum RUV.
Hetta skal millum annað gerast við at einfalda umsitingina í landinum. Millum annað verður sambært RUV ein ráðharrastova stongd.
Stjórnin vil eisini hava fólkaatkvøðu um, hvørt landið skal halda fram við samráðingunum um ES-limaskap. Atkvøðugreiðslan skal fara fram í seinasta lagi í 2027.
Harumframt skal Ísland vera CO2-neutralt í 2040.
Tað er fyrstu ferð í søgu Íslands, at allir forleiðararnir í stjórnarflokkunum eru kvinnur. Tað er samstundis fyrstu ferð, at landið hevur havt kvinnuligan forseta og forsætisráðfrú samstundis. Tað skrivar Reuters.
Sambært RUV verður 36 ára gamla Frostadóttir eisini yngsti stjórnarleiðari í søgu Íslands.
Samfylkingin gjørdist størsti flokkur á valinum í november við 20,8 prosentum av atkvøðunum. Hetta gevur flokkinum 15 av teimum 63 sessum á tingi.
Í nýggju íslendsku stjórnini verða Samfylkingin, Flokkur Fólksins og Viðreisn.
Teir fingu ávikavist 10 og 11 sessir á tingi, Altingi, á valinum.
Teir tríggir stjórnarflokkarnir vóru í andstøðu móti undanfarnu stjórn.
Bjarna Benediktsson, forsætisráðharri, úr konservativa Sjálvstæðisflokkinum, stóð á odda fyri fráfarandi stjórnini.
Men eftir stórar trupulleikar í hansara samgongustjórn, mátti tað kasta handklæðið í oktober og útskriva val.
Sjálvstæðisflokkurin fekk 19,4 prosent av atkvøðunum á valinum og gjørdist næststørstur.
/Ritzau/
