Tíðliga seinnapartin spældu landsliðsliðskiparin, Ásla Johannesen og liðfelagar hennara ein sera torføran dyst á útivølli móti oddaliðnum í bestu svensku fótbóltsdeildini, Hammarby.
Hammarby vann dystin 2-1. Hamarby skoraði beint undan og beint eftir steðgin. Wilma Carlsson fekk minkað um munin fyri Piteå beint undan dystarenda.
Ásla var á vøllinum í 80 minuttir í dag. Piteå er nummar 11 í deildini við átta stigum fyri átta dystir. Talan var um triðja tapið á rað hjá Piteå.
Jóhanna Fossdalsá Sørensen var á vøllinum allan dystin, tá hon og liðfelagarnir í Häcken á heimavølli vunnu stórsigur 6-1 (2-0) á Alingsås.
Häcken er triðfremst í deildini við 15 stigum. Tær eru fýra stig aftanfyri oddaliðið, Hammarby. Talan var um annan sigurin á rað hjá Häcken.
Komandi leygardag spælir Häcken dyst á útivølli móti Rosengård. Dagin eftir tekur Piteå móti Linköping á heimavølli.
