Í summar leikti Marius Kryger Lindh tveir dystir fyri B36 í Conference League undankappingini móti lettiska liðnum, Auda.
Felagsskapurin fyri fótbóltssøgufrøðingar og fótbóltshagtalsfólk, IFFHS - International Federation og Football History and Statistics - er komið fram til, at Marius Kryger Lindh, ið er føddur við bert einum armi er bert ein av fimm fótbóltsleikarum við einum armi í fótbóltsheimsøguni, ið hevur spælt altjóða fótbóltsdystir.
Yvirlitið hjá IFFHS sær soleiðis út:
##med2##
Guy Thill úr Luksemborg spældi fyri luksemborgska 3. deildarliðið, Jeunesse Hautcharage tveir dystir móti Chelsea í Cup Winners Cup - Europa Cup fyri steypavinnarar. Jeunesse Hautcharage tapti samanlagt 21-0 fyri Chelsea, 0-8 heima og 0-13 úti.
Norðurírski Jimmy Hasty misti annan armin í einari arbeiðsvanlukku, tá hann var 14 ára gamal. Tá írska liðið, Dundalk - sum vit føroyingar kenna væl - vann 2-1 á Zürich í dysti á útivølli í Europa Cup í 1963 skoraði Jimmy Hasty annað málið og legði upp til hitt málið. Dundalk tapti tó 0-3 á heimavølli. Kappingarárið 1963-1964 var Jimmy Hasty annar av toppskjúttunum í bestu írsku fótbóltsdeildini. Fjeppararnir hjá Dundalk góvu Jimmy Hasty kelinavnið: “the One-Armed Wonder”.
Týski, Robert Schlienz misti vinstra forarmin aftaná eitt ferðsluóhapp í 1948. Fýra mánaðir aftaná ferðsluóhappið var Robert Schlienz kortini klárur at spæla dyst aftur fyri Stuttgart. Í 1955 og 1956 spældi Robert Schlienz tríggjar landsdystir fyri Vesturtýskland, ið hevði legendariska, Sepp Herberger sum venjara. Sami Herberger førdi Vesturtýskland til HM-gullið í HM-endaspælinum í Sveis í 1954. Tá vunnu vesturtýskarar í finaluni í Bern 3-2 á heimsins besta landsliðið tá, Ungarn.
Héctor Castro úr Uruguay, ið hevði kelinavnið: "El Manco" (hin einarmaði) spældi 25 landsdystir fyri Uruguay, har hann og liðfelagarnir fingu nógv burturúr. Í 1928 vann saman við liðfeløgunum OL-gull í Amsterdam, og tvey ár seinni vann hann saman við liðfeløgunum fyrsta HM-endaspælið í søguni á heimavølli í Uruguay. Undir HM-endaspælinum í 1930 skoraði Héctor Castro eisini fyrsta málið, ið var skotið á Estadio Centenario leikvøllinum í Montevideo, har finalan móti Argentina seinni var leikt. Héctor Castro skoraði eitt mál í 4-2 finalusigrinum á Argentina, og tað gjørdi hann ikki minni legendariskan í Uruguay.
Spurdur av in.fo um hvussu tað kennist at vera partur av einum slíkum fótbóltssøguligum yvirliti, svaraði Marius Kryger Lindh - og vit taka tað á donskum - : "Jeg var faktisk ikke klar over det. Når jeg spiller fodbold og generelt i hverdagen, så tænker jeg jo ikke så meget over at jeg mangler en arm. Jeg er selfølgelig stolt af at man sagtens kan følge sin drøm, på trods af, at man har et handicap og at man ikke skal lade sig begrænse. Jeg er stolt af at være en af de 5 der medlem af denne “klub”. Og jeg håber selvfølgelig på endnu flere kampe i Europa." Svaraði B36-leikarin.
HER ber til at lesa greinina hjá IFFHS um hesar fimm ótrúliga fótbóltsleikararnar, ið hava spælt altjóða fótbólt, hóast teir bert høvdu/hava ein arm. Ivan Eginsson Eysturland eigur sín stóra og góða lut í, at hetta er komið fram í ljós.
