Danska forsætisráðfrúan skal í morgin á trygdartoppfund í Føroyum, har norðuratlantisku leiðararnir savnast.
Í morgun verður Havnin karmur um ein norðuratlantiskan toppfund í Føroyum, har fýra stjórnarleiðarar savnast at umrøða trygdarpolitisku støðuna, skrivar danska tíðindastovan Ritzau.
Her hittir danski forsætisráðharrin, Mette Frederiksen, føroyska løgmannin, Aksel V. Johannesen, landsstýrisformannin í Grønlandi, Jens-Frederik Nielsen, og íslendsku forsætisráðfrúuna, Kristrún Frostadóttir.
Norski forsætisráðharrin, Jonas Gahr Støre, luttekur á fundinum virtuelt.
Hetta skrivar danska forsætismálaráðið í tíðindaskrivi.
Fundurin er partur av einum virknum fundarkalendara fyri stjórnarleiðarar, sum hittast so ofta sum gjørligt í hesum skiftandi tíðum.
Tað eru ikki meira enn tvær vikur síðani, at Mette Frederiksen bjóðaði grønlendska landsstýrisformanninum, Jens-Frederiki Nielsen, vælkomnum í danska fólkatingið.
So seint sum seinasta fríggjadag luttók forsætisráðfrúan eisini á altjóða toppfundi í Oslo í Noregi.
- Sjálvt um lond okkara hittast ymsastaðni í heiminum, so er tað natúrligt, at vit, í hesum bólkinum av londum, hittast at umrøða verandi trygdarstøðu í Arktis og Norðuratlantshavi, sigur Mette Frederiksen, forsætisráðfrú, í tíðindaskrivinum.
- Eg fegnist tí um, at tað ber til at hittast í Havn, og at Noreg kann luttaka á fundinum virtuelt.
Tiltakið mánadagin verður lýst sum ein trygdarpolitiskur fundur.
Norðuratlantshavið er eisini vorðið eitt møguligt konfliktríkt øki, eftir at serliga Arktis í áravís hevur verið mett sum eitt lágspenningsøki.
Við áhuganum hjá USA til Grønland, vaksandi hóttan frá Russlandi og áhuganum hjá Kina fyri Arktis, eru vesturlendskir stjórnarleiðarar vorðnir meira tilvitaðir um økið.
Samrøðan við sameind skal tí vera tøtt, boðar danska forsætisráðfrúan frá.
- Føroya løgmaður og eg eru samd um, at tætt samskifti er avgerandi, eisini tá hugsað verður um tíðina, vit liva í beint nú. Tí vildu vit hittast skjótt. Eg gleði meg at umrøða millum annað samstarv okkara, tá vit hittast í morgin, sigur Mette Frederiksen, forsætisráðfrú, í fráboðanini.
/Ritzau/
