Bæði føroyingaliðini vóru í leiki í bestu svensku hondbóltsdeildini í kvøld.
Óli Mittún, Ísak Vedelsbøl og liðfelagarnir í Sävehof tóku ímóti Skövde í Partille.
Dysturin endaði við teprum 32-31 sigri til Sävehof. Óli skoraði sigursmálið tá 28 sekund vóru eftir at leika. Í steðginum var Sävehof á odda 17-13.
Óli var toppskjútti hjá Sävehof. Hann skoraði níggju mál, og legði upp til trý mál. Ísak skoraði eitt mál.
Sävehof er næstfremst í deildini við 17 stigum. Ystad er fremst við 21 stigum.
Rói Ellefsen á Skipagøtu og liðfelagarnir í Hallby tóku ímóti Malmö í Jönköping.
Malmö vann dystin 32-28. Í steðginum var Malmö á odda 17-16.
Rói skoraði seks mál, og legði upp til eitt mál. Rói var toppskjútti hjá Hallby í kvøld.
Hallby er nummar níggju í deildini við 13 stigum.
Sostatt vóru 16 føroysk mál skotin í bestu svensku deildini í kvøld.
