Thorir Hergeirsson gevst sum landsliðsvenjari hjá norska kvinnuhondbóltslandsliðnum eftir EM í november og desember.
Tað sigur 60 ára gamli íslendingurin á tíðindafundi, sum norska hondbóltssambandið NHF skipaði fyri á Ullevaal leikvøllinum í Oslo.
Soleiðis endar eitt 15 ára skeið hjá Hergeirsson, sum fekk høvuðsábyrgdina í 2009 og hvørs sáttmáli gongur út eftir EM.
Hesa tíðina hevur Noreg vunnið eitt hav av titlum. Samanumtikið hevur tað givið 16 meistaraheiðursmerki - harav tíggju eru gull.
- Tað hevur verið ein ævintýrakend ferð, sigur hann við heimasíðuna hjá norska hondbóltssambandinum.
Undir Hergeirssyni vann Noreg OL gull 2012 og 2024, HM gull 2011, 2015 og 2021 og EM gull 2010, 2014, 2016, 2020 og 2022.
- Eg haldi, at tað er tað rætta hjá mær at steðga. Eg veit, hvat tú sigur ja til. Og eg veit eisini hvat fólk siga nei til.
- Eg haldi, at tað er tað rætta fyrst og fremst fyri meg sjálvan, sigur hann á tíðindafundinum.
Við at gevast nú fær eitt nýtt venjaratoymi næstan eitt fýra ára fram til OL í 2028, og tað er eitt gott arbeiðstíðarskeið, heldur fráfarandi venjarin.
Áðrenn 2009 var Hergeirsson í nøkur ár hjálparvenjari hjá Norra, sum hevði Maritu Breivik sum landsliðsvenjara. Samanumtikið hava tað verið 30 ár runt um norska liðið.
Kåre Geir Lio, sum er forseti í NHF, er harmur um at siga væleydnaða venjaran farvæl, men skilir samstundis avgerðina.
- Tað, sum hann hevur gjørt, talar fyri seg, sigur Kåre Geir Lio.
Enn hevur Noreg ongan avloysara upp á pláss, men tað arbeiðið er farið í gongd nú, sigur Erik Langerud, sum er aðalskrivari í NHF.
- Vit mugu brúka nóg góða tíð til at finna ein arving, men ikki meira tíð enn neyðugt, sigur Langerud.
EM verður hildin í Eysturríki, Ungarn og Sveis og byrjar 28. november.
/ritzau/
