- Poul Hansen samtakið hevur framt ymiskar bygnaðarbroytingar og hevur sett tveir nýggjar stjórar, sum skulu reka framtíðarvirksemið hjá samtakinum. Talan er um Báru Hansen og Tony Rasmussen.
Tað siga tey í tíðindaskrivi frá Poul Hansen-samtakinum í dag.
- Høgni Hansen, sum eigur og hevur stjórnað samtakinum seinastu 35 árini, verður nú arbeiðandi nevndarformaður, verður lagt aftrat.
Poul Hansen-samtakið hevur gjørt av at gera ymiskar bygnaðarbroytingar og hevur stovnað eitt nýtt holdingfelag, Poul Hansen Holding - við verandi partaeigara, sum síðan fer at eiga tvey ymisk partafeløg.
- Annað verður P/F Poul Hansen, sum fer at reka Poul Hansen heilsølu, Gastro, Krás og annað handilsvirksemi, meðan hitt verður P/F Bryggjubakki, sum fer at fáast við íløgur, fastognir, dótturfeløg og annað virksemi.
Í tíðindaskrivinum verður sagt, at Høgni Hansen verður arbeiðandi nevndarformaður fyri P/F Poul Hansen og P/F Bryggjubakki. Bjarne P. Bak, Rodmundur Nielsen og Bára Hansen verða nevndarlimir í báðum feløgunum.
- Bára Hansen verður síðan stjóri fyri P/F Bryggjubakki, meðan Tony Rasmussen verður stjóri fyri P/F Poul Hansen.
Poul Hansen stovnaði fyritøkuna í 1927, og hevur fyritøkan sostatt skjótt 100 ára á baki. Fyritøkan hevur øll árini verið ein familjufyritøka, og verður tað nú fjórða ættarliðið, sum tekur við róðri saman við Tony Rasmussen
Bára Hansen og Tony Rasmussen hava bæði starvast i fyritøkuni tey seinastu nógvu árini og hevur Tony síðstu árini verið søluleiðari fyri Gastro.
Virksemið hjá Poul Hansen hevur fevnt breitt í næstan eina øld og virkar fyritøkan enn innanfyri fleiri ymisk vinnuøki og vinnuáhugamál.
- Bygnaðarbroytingarnar er tí framdar fyri at einfalda bygnaðin og fyri at framtíðartryggja fyritøkuna, verður sagt í tíðindaskrivi í dag.
