Á Fiskamarknaði Føroya vita tey at siga, at annað av teimum størru ísfiskalínuskipunum er til fiskiskap í løtuni.
- Teir eru vestanfyri og fáa mest av hýsu og toski. Skipið kemur inn at landa í vikuni sum kemur.
Tað er sjáldan, at tíggju frystilínuskip eru til fiskiskap undir Føroyum í senn, men soleiðis er í løtuni.
- 10 frystilínuskip eru til fiskiskap undir Føroyum, og eitt er til fiskiskap í íslendskum sjógvi.
Sagt verður, at frystilínuskipini, sum eru undir Føroyum, fáa eina blanding av hýsu, longu og brosmu.
Vit gita, at orsøkin til, at so mong frystilínuskip í løtuni eru undir Føroyum, er, at kvoturnar hjá hesum skipum aðrastaðni eru uppfiskaðar.
Og nú fer hetta fiskiárið eisini at halla.
Um útlitini til útróður í næstu viku verður sagt, at streymurin harðnar, sum vikan gongur, og veðurvánirnar eru einki serligar.
- Tí verður ikki roknað við nøkrum serligum útróðri í næstu viku, men kanska onkur av størru útróðrarbátunum ger onkran túr, verður lagt aftrat.
