Nú váttar russiska løgreglan, at generalurin, Igor Kirillov, læt lív í einari spreinging í Moskva tíðliga í morgun.
Sum skilst, var tað ein bumba, sum var krógvað í einum el-rennihjóli, ið beindi fyri russiska generalinum.
Igor Kirillov hevur havt leiðsluna fyri eitt nú russisku kjarnorkuvápnunum, og hann hevur eisini havt leiðsluna fyri kemiskum og lívfrøðiligum vápnum hjá russiska herinum.
Seinni í morgun hevur ukrainska trygdartænastan váttað, at tað var hon, sum stóð aftanfyri álopið á generalin í einum serligum átaki.
Ein annar maður, sum var hjálparmaður hjá Igor Kirillov, læt eisini lív í álopinum, sum fór fram uttanfyri miðbýin í Moskva og bert einar sjey kilometrar úr Kreml.
Russiskir miðlar lýsa hendingina sum morð, vita útlendskir miðlar at siga í morgun.
