Ein tólv ára gomul genta og ein 25 ára gomul kvinna vórðu dripin í einum russiskum dronuálopi á ukrainska býin, Nikopol, í kvøld.
Tað upplýsa ukrainskir myndugleikar.
- Gentan og kvinnan, sum lótu lív í álopinum, sótu í einum bili, sum varð raktur. Í bilinum var eisini eitt fýra ára gamalt barn og ein 25 ára gamal maður, sum bæði fingu løstir.
Hetta skrivar guvernørurin í ukrainsku Dnipropetrovsk-regiónini, Serhij Lysak, á Telegram í kvøld.
Sagt verður, at russar brúktu sonevndar kamikaze-dronur í álopinum.
Nikopol, sum er ídnaðarbýur, liggur í syðra parti av Zaporizjzja-regiónini.
Býurin liggur vestaru megin Dnipro-ánna og beint yvir av stóra Zaporizjzja-kjarnorkuverkinum, sum russar hertóku tíðliga í krígnum.
##med2##
Í kvøld veit Reuters eisini at siga, at ein íbúðarblokkur í ukrainska býnum, Kharkiv, er raktur í russiskum rakettálopi í kvøld.
Kharkiv er næst størsti býur í Ukraina og liggur lutfalsliga tætt upp at markinum til Russlands.
Borgarstjórin í Kharkiv, Ihor Terekhov, sigur sambært Reuters, at í minsta lagi 12 fólk hava fingið løstir í russiska álopinum í kvøld.
