Í eini fráboðan, sum er almannakunngjørd á heimasíðuni hjá ES, siga 26 ES-leiðarar seg fegnast um royndirnar hjá Trump forseta at skapa frið í Ukraina.
Men tey vísa eisini á, at eftir teirra tykki kann friður í Ukraina ikki fáast uttan at Ukraina er við samráðingarborðið.
Øll luttakandi londini uttan Ungarn taka undir við yvirlýsingini, sum varð gjørd seint mánakvøldið.
Hetta kom eftir at uttanríkisráðharrarnir í teimum 27 ES-londunum høvdu telefonfund, har evnið júst var amerikanska meklingaroyndin í ósemjuni millum Ukraina og Russland.
- Ukrainska fólkið skal hava frælsi til at avgera sína egnu framtíð. Leiðin til frið í Ukraina kann ikki ásetast uttan Ukraina.
- Innihaldsríkar samráðingar kunnu bert fara fram í sambandi við vápnahvíld ella niðurlaging av ósemjuni, stendur millum annað í fráboðanini.
Evropeisku leiðararnir leggja dent á, at ein friðaravtala skal virða altjóðarætt, herundir meginreglurnar um sjálvstýri, fullveldi, økisrætt.
/Ritzau/
