Seint í gjárkvøldið tók Fiskiveiðieftirlitið ein bretskan trolara - Venture IV - sum fiskaði í stongdum øki í ein útnyrðing úr Mykinesi.
Tað var Brimil, ið tók skipið, sum fiskaði í sonevnda H-kassanum, sum hevur verið stongdur fyri trolveiði í fleiri ár.
Trolarin varð tikin við á Havnina, og her fekk skiparin eitt sektaruppskot frá Fiskiveiðieftirlitinum, sum reiðaríið góðtók.
Tá Fiskiveiðieftirlitið hevði fingið trygd frá reiðarínum fyri sektaruppskotinum, var skipið leyst, og seint seinnapartin loysti Venture IV aftur.
Á Fiskiveiðieftirlitinum verður sagt, at í sjófeingislógini er heimild at geva fyrisitingarligar bøtur fyri ólógliga fiskiveiði.
- Men, góðtekur skiparin ikki bótina, verður málið latið løgregluni, og tað ynskti skiparin á bretska trolaranum ikki.
Sagt verður, at bæði reiðaríið og skiparin eiga at vita, at H-kassin er stongdur fyri trolveiði, tí hetta er ein partur av kunningini í samband við sínámillum fiskiveiðiavtaluna, sum Føroyar hava við Stórabretland.
##med2##
Á Fiskiveiðieftirlitinum verður sagt, at bretski trolarin er ikki ókendur í føroyskum sjógvi, og tískil eigur skiparin at vita, hvørjar leiðirnar eru, sum eru stongdar fyri trolveiði.
- Venture IV var ikki langt innan fyri, men hann var innanfyri. Nú er málið so avgreitt við, at skiparin góðtók sektaruppskotið, siga tey á Fiskiveiðieftirlitinum í kvøld.
