Fleiri tilflytarar úr Eritrea máttu innleggjast leygardagin, eftir at teir høvdu krógvað seg í einum kølibili á veg úr Fraklandi til Bretlands.
Tað skrivar franska tíðindastovan AFP.
Tilsamans høvdu 15 tilflytarar fjalt seg í kølibilinum, men bilførarin hoyrdi teir rópa um hjálp á einum hvíliøki við ein motorveg.
Tað upplýsir Christian Vedelago, sum er leiðari á skrivstovuni hjá lokala prefektinum í Pas-de-Calais í Norðurfraklandi.
- Hypotermiska støðan hjá teimum bendir á, at teir høvdu verið har í fleiri tímar, sigur hann.
Hypotermi merkir, at kroppurin hevur lágan kjarnuhita og er sambært sundhed.dk definerað sum kjarnuhiti undir 35 stig.
Fýra av tilflytarunum máttu innleggjast á sjúkrahús. Harumframt vóru fýra ung í bólkinum, sum vórðu latin einum felagsskapi.
Fleiri av tilflytarunum høvdu eisini longu fingið embætisboð um at fara úr Fraklandi.
Marokkanski bilførarin, sum flutti fryst grønmeti, er ikki kannaður, leggur Christian Vedelago afturat.
Hóast umfatandi trygdarkanningar í havnunum í Norðurfraklandi, har ferjur fara til Bretlands, royna tilflytarar framvegis at fara umborð á lastbilar, sum eru á veg til Onglands. Sama er galdandi fyri Eurotunnilin, sum bindur Frakland og Ongland saman.
Tann fyrst valda leiðin hjá tilflytarum er at fara yvir um sundið í smáum bátum.
Síðan 2018, tá myndugleikarnir fóru undir at telja tilflytarar í Ermasundi, eru fleiri enn 170.000 tilflytarar ólógliga komnir úr Fraklandi til Bretlands.
Í juli gjørdu Bretland og Frakland eina avtalu um at senda tilflytarar, sum koma við smábátum til Bretlands, aftur til Fraklands.
Fyri hvønn tilflytara, sum verður sendur aftur, verður ein friðskjólsøkjari sendur lógliga og tryggari til Bretlands.
Frá 30. juli í ár høvdu næstan 25.500 tilflytarar farið yvir um sundið í smábátum, sambært BBC.
Ritzau/AFP
