Um 15.30-tíðina í gjár fekk løgreglan fráboðan um, at ein ferðamaður hevði verið áhaldsin í haganum og hevði brotið sær fótin.
- Talan var um eitt týskt par, sum hevði verið sær ein túr í Hvannhaga. Tað var á veg omanaftur móti Tvøroyri, at maðurin var áhaldsins og breyt sær fótin.
Vaktleiðarin visti í morgun at siga, at sjúkrabilur og bjargingarfólk vórðu send eftir manninum.
- Koyrt varð so langt niðan sum slapst, og síðan fóru bjargingarfólk leiðina víðari eftir ferðamanninum, sum varð fluttur á Suðuroyar Sjúkrahús.
Løgreglan sigur, at týsku ferðafólkini sjálvi fingu boðað frá, hvat var hent á leiðini heimaftur úr Hvannhaga, og tíbetur spældi alt væl av.
