Árstíðin við ferðafólkaskipum í Vági í ár er av, og í summar hava seks ferðafólkaskip vitjað í Vági.
- Seinastu trý árini hevur kommunan arbeitt miðvíst við at fáa ferðafólkaskip at koma higar. Arbeiðið at byggja upp eina vinnu við ferðafólkaskipum tekur tíð – serliga orsaka av, at skipini ofta hava lagt sínar ferðir fleiri ár fram í tíð.
Soleiðis siga tey í Vágs kommunu í ár, har tey í vikuni hava havt vitjan av seinasta ferðafólkaskipinum á hesum sinni.
- Ein staður skal eisini hava ymiskt áhugavert at bjóða ferðafólkunum, sum eru umborð á skipunum.
Í Vági siga tey, at starvsfólk hjá kommununi hava lagt nógva orku í at fáa skip at koma til Vágs, og somuleiðis er nógv orka løgd í fyrireikingararbeiði uppundir komurnar, soleiðis at íbúgvar, vinnulív og ferðafólk hava fingið nakrar góðar dagar í Vági.
- Tað er umráðandi fyri okkum, at ferðafólkini fáa eina góða og veruliga uppliving, tá tey vitja Vág. Somuleiðis er tað umráðandi, at tey, sum búgva í Vági og tey, sum reka handilslív, fáa væl burturúr vitjanunum.
Tað sigur Magnus Pauli West, trivnaðarleiðari í Vágs kommunu.
Í 2023 kom eitt ferðafólkaskip á Vág, og soleiðis var eisini í 2024.
- Í ár høvdu sjey skip boðað frá, at tey komu á Vág, men eitt gav avboð fyrst í juni, orsaka av ringum veðri. Fyrsta skipið kom í mai, og í juni komu trý skip – øll í somu viku, og í julimánað komu tvey skip.
Lagt verður aftrat, at seinasta skipið í hesum umfari - Seabourn Venture - fór avstað í gjár, 9. juli.
Marin H. Gårdlykke, forkvinna í havna- og vinnunevndini hjá Vágs kommunu, vísir á, at Vágs havn hevur fingið eina framúr byrjan í cruisevinnuni, og vónandi fer góða gongdin at halda fram.
- Skipini og ferðafólkini fáa góða móttøku her í Vági, og okkara lítla cruise-toymi í Miðlatúni stendur seg væl, og er við at lyfta tænastuna í Vági, sigur hon.
Tey seks ferðafólkaskipini, sum hava vitað í Vági í summar, hava havt 897 ferðafólk, og manningin hevur talt 850.
- So, samanlagt hava 1.747 fólk verið umborð á hesum skipum, siga tey í Vágs kommunu í dag.
